Bis zer Fasnacht 2020 goot s no 02.03.2020 4:00 132 Dääg
"Uus unserem Glyggelääbe" PDF Druckbutton anzeigen? E-Mail
Geschrieben von: Andy "Munster" Hermann   

In der Junge Garde vo den Aagfrässene isch immer ebbis los! Syyt em Johr 1971 steehn mer and der Fasnacht y und gniesse der Höhepunggt im Glyggejohr, die drey scheenschte Däg, in volle Zyg. Ass es an der Fasnacht musikaalisch guet deent, iebe mer s ganz Johr yber, am Donnstigzoobe pfyffe d Pfyffer und Pfyffferinne im Holbeinschuelhus und d Dambuure schwinge ihri Schlegel am Donnschtigzoobe in unserem wunderscheene Glyggekäller am Nodlebärg. Instruiert wärde die Junge vo intärne und extärne Instruggter.

Well an der Fasnacht nit nur s Musikaalische, sondern au s Optische e wichtigi Rolle spyylt, hän mer e Sujetkommission. Die Sujetkommission bestoht uss Kinder vo der Junge Garde und Hälfer vom Stamm, sie dien zämme s Sujet ussarbäite, sie iberlege sich, welli Goschdym zum Sujet passe wurde, welli Stoff sich derfyr aigne und spräche sich mit der Schnydere ab. Denn geehn sie in der Arbetskäller an der Hardstrooss und sueche deert uss ganz e Huuffe Larveforme aini oder mehreri uss. Wenn sie e passendi Form gfunde hän, gohts ans Kaschiere. Jedes Johr im Herbscht findet der „Kaschiermarathon“ statt, das isch e Wuuchenänd, wo im Arbetskäller gschaffe wird bis d Wänd gwaggle! Alli Junge hälfe mit, es wärde Larve kaschiert und Perügge knipft.

Näbscht de Fasnachtsvorberaitige gits e Huufe Ussflyg s ganz Johr duure: Im Summer träffe sich alli Kinder, d Eltere und d Mitglieder vom Stamm zem ene Grillplausch mit vyyl Ässe und Spyyl. Im Herbscht geehn mer uff Ruscht in Europa Park, die Wilde seggle deert vo Bahn zue Bahn, die wo s gmietlig näh wänn, laufe und luege umme und leehn sich vo däre Erläbniswält verzaubere. Langwyylig wird’s uff jede Fall niemerem. Afangs Dezämber findet der dradizionell Niggi Näggi Nomidag statt. Als Ystimmig uff d Fasnacht mässe sich die Junge denne am intärne Brysdrummlen- und Pfyffe, wo scho e baar Johr im grosse Saal vom Rialto yber d Bihni goht. Es git tolli Pryyse fyr die Grosse und die Klaine z gwinne! Im Friehlig, wenn d Fasnacht und der Bummel scho lengscht der Vergangehait agheere, foht s neye Glyggejohr a und mer freyen ys uff die näggscht Fasnacht und uff dä Momänt, wos am Mäntig am Vieri haisst: Morgestraich vorwärts Marsch!