50 Joor Cliquekäller

S hett emool vor iber 50 Joor im Rosshof e tiefe, dunggle und fiechte Käller gäh. Villicht sin au no Ratte ummegsegglet aber vor allem hett dert offebar e guete Gaischt gwoont denn dä wacht au hitte no iber unserem prächtige Cliquekäller und dorum hän mirs au so friedlig und gmietlig mitenander. E paar jungi Aagrässeni hän gfunde us däm Rosshofkäller kennt me doch e Cliquekäller mache. Ze säller Zyt isch es Mode gsi, dass e gueti Clique ebe au e Cliquekäller het. Die junge Pionier, hauptsächlig dr Alex dr Käschpi und dr Urs wo jo vom Fach gsi sin hän sich dra gmacht und no lange schwierige Verhandlige d Bewilligung zem baue z bikoo.. Me het denn grächnet, gmässe und d Beziehiege spiile losse dass me s Baumateriel megligscht gratis oder ze bescheidenem Prys griegt hett. Viil Wisse und viil Hälferwille hetts brucht fir das Projäggt. Aber jetz schweifi ab i soll jo ibers Fescht schriibe.

Also mir hän uns im Holsteinerkäller troffe. Dert hetts Apero gää. Die Alti Garde hetten spändet. Wunderbaare Späckgugelhopf , Chips und Nüssli und natirlig au z Dringge. Vo dr Alte Garde sin alli do gsi wo nit grangg, in de Ferie oder anderwyttig angagiert gsi sin. Vo de andere Holdingmitglieder sin au viil Persone aawäsend gsi. S hett denn no e Wettbiwärb gää iber dr Käller. Dert hett me gmergt wie wenig s Erinnerigsvermeege no spiilt. No eppe zwei Stund isch me denn in unseri Heimat, ebbe em Cliquekäller gange.

Oh wie schön isch dä Käller deggoriert gsi. Zwei Reihe Tisch mit Kerzeständer und scho aazindeti Kerze und emene Gedegg mit ere Foti vom alte Rosshofareal vor 50 Joor. S isch seer feschtlig gsi. Me hett sich gsädlet und isch denn eppis z dringge go hole. Unsere Obma dr Peter Spieler het dr Wärdegang vom Käller vorgläse, was seer beiidruggend gsi isch und was do alles gleischtet worde isch.Pletzlig hetts gheisse «ässe». Me het kenne aastoo und isch denn bedient worde. Spaghetti, Ghackts, Tomatesosse Pesto und Kääs hetts gää. Nonere wytere Pause het me derfe e Ryysecremeschnitte go hole. Wär hett welle hett au no e Käffeli kenne hole und natirlig au e Schnäpsli.

Denn isch d Uffleesig vom Wettbiwärb ko. Oh wie sin mir doch dernääbe glääge aber epper hett halt am meischte gwisst und het denn au e Prys griegt. Immer zwischeduure het au d Jazz-Guggemuusig «Los Amarones» uffspiilt. Die hämmer jo scho am Bummel derfe loose. Am Applaus a hetts offebar alle gfalle. So isch dä dänggwirdig Aaloss wytergange mit dringge,plaudere, lache. Scheen isch es gsi es hett mr gfalle. Dangg an alli wo das meglig gmacht hän.

Heidi

Es Video findet ihr uf der Fotisite