Summerstämm 2024
1. Summerstamm vom 3. Juli 2024, Superknaller
Am Morge isch es grau in grau gsy, ab und zue het e dungels Wölgli usgläärt, aber i ha immer no hofft dass es mit dr Zyt droggener und wärmer wurdi, aber nyt isch gsy. Woni zobe uff die säggsi bim Stadthof aako bi hani im Gässli, wo eigentlig unsere Superknaller hät sotte stadtfinde, keini Tisch, keini Stiel, keini Sunneschirm gsee- e drurige Aabligg isch es gsy.
Vor em Stadthof sin scho e paar Activi, Passivi und Activ-Passivi gsässe, alli mit Jagge und es hett grad emol nit gschifft, gsässe. I ha alli bigriesst und ha no e paar Foteli welle mache. Leider isch mi welle am könne gschiteret. I ha alli verzitteret.
Nodisno sin immer meer Altgardischte ko und denn isch me uffe in erschte Stock wo mer jo immer an dr Fasnacht sin, go Platz nää. Viili sin scho do gsi. Im Ganze sin 24 Persone ko. Gly isch yygschänggt worde. Me zaalt jo ei Bitraag und ka ässe und dringge soviil me will, nämlig Bier, Wysse, Rote oder Wasser. Zem Aesse isch zerscht e gmischte Salat Brot und Angge serviert worde nochhär heisse Beischungge und Härdepfelsalat. Speter e feins Dessert und e Kaffi oder Espresso. Dr Seppi, dr Beizer, hett sich au zeigt, hett do und dert e Schwsätzli gmacht, bi uns hett är no zwei Schöggelig stipizt und so hämmer mit plaudere und viil lache e ganz e herrlige Obe verbrocht
S Aesse isch wirglig guet gsi, dr Schungge und au dr Härdepfelsalat sin frisch gsi. Was will me no mee. I frei mi scho wieder uff dr nägschti Summerstamm uff dr Scholle, hoffentlig bi scheenerem Wätter.
Heidi
2. Summerstamm vom 10. Juli 2024, uff dr Scholle
Zem vierte Mool hämmer dr Summerstamm uff dr Scholle dank dr Yvonne derfe durefiere. 30 Persone sin aawäsend gsi. Mir sin jo bald e grossi Clique. Zerscht simmer im Garte gsässe bi no schönem, warmen Summerwätter hämmer kenne aperöle. Nochhär isch gwärweist worde eb me dusse oder dinne soll ässe. Wo sich denn so dunkli Wolgge iber em Summerhimmel zeigt hän, hämmer bschlosse mer ässe dinne in däm gmietlige Beizli. Gly isch s Aesse serviert worde, nämlig warme Fleischkäs gmischte Salat und Härdöpfelsalat, grad richtig bidäm warme Wätter und sofort hetts afo rägne, also isch unsere Entscheid ine go ässe richtig gsi. S isch nit lang gange und scho isch dr Räge wieder vorbi gsi. Nodisno isch me wieder and Frischi gange. S isch seer aagnäm gsi dr Räge het fir e par Grad weniger gsorgt. Do simmer ghögglet, hän no Heidelbeeri vom Garte derfe schmatze und bald hetts e Dessert gä; e Glace miteme Schwyzerkriz; es isch jo bald 1. August. Und was nimmt me derzue? Natirlig e Kaffi oder e Espresso und wär hett welle au no e Schnäppsli.
Me hett natirlig iber Fuessball und au ibers Cliqueläbe diskutiert. Wie das halt eso isch, me kunnt vom hunderschte ins tausigschte. So isch wieder e schöne Obe vorby gange sisch denn au wieder ko drepfele und denn simmer, ämmel die meischte, mit em Bus Richtig Stadt gfaare. Bim usstiige isch es wieder drogge gsi. Schön isches gsi i hoff dr Wättergott het e Erbarme mit uns wenn mer am nägschte Mittwuche wänn go Schifffaare.
Heidi
D Foteli sin vom Uschi Spieler, au die wiitere in der Fotogalerie.
3. Summerstamm vom 17. Juli 2024, Langschiff
Dä Summerstamm isch wirglig summerlich gsi, e prächtige, warme Summerobe isch es gsi, immer wieder e lichts Liftli isch ko, besser hätts nit kenne sy. Dr Rhy isch zwor immer no rächt hoch gsi derfir hetts Langschiff rassig kenne abwärts faare. Es sin 19 Persone mitgfaare. Es hett natirlig wie immer Uff em Schiff e Apero gää (Wysse, Bier Mineral und Butterstängeli). 10 Mitglieder sin no zuesätzlig zem Aesse ko. Schön dass die Summerstämm eso guet bsuecht sin. Ebbe am siebini sin die Nautiker bi dr Klause vo de Horburger Sportfischer aaglandet. Me het sich begriesst hett eppis z dringge bstellt und scho gly isch zer Sälberbedienig ufftischt worde. Es hett e feine Brote, verschiedeni Saläter und feins Brot gää. Mer sin wieder e gmietligi, luschtgi Gsellschaft gsi. D Sorge hett me kenne dehaim losse, falls me iberhaupt so ebbis het.
Bis zem nägschte Mittwuche mit dr Stadtfierig vo dr Maja.
Heidi
D Fotieli in der Galerie sin vo dr Daniela
4. Summerstamm vom 24. Juli 2024, Stadtfierig mit der Maja
Scho hämmer uns zem 4. Summerstamm troffe, wie die Zyt vergoot. Am halber sägsi het me miesse
Bim St.Johann Tor sy. 23 Persone sin zer Stadtfierig mit unserer Pfyfferinstruggtere Maja ydroffe. Sisch wieder e ganz e scheene Obe gsi, d Tämberatur isch seer agnääm gsi, nit z heiss und au nit z kalt. Zerscht simmer underem Tor,scheen im Schatte gstande und d Maja het wie immer luschtig verzellt wie das Tor entstande isch und wies no dr Zerstörig wieder uffbaut worde isch. Und wie das mit däne Tor gsi isch, sin si zobe gschlosse worde und wär nit zer Zyt ko isch hett miesse dusse blibe. D Maja weiss immer luschtigi Bigäbeheiten zverzelle. Nochhär simmer uffegstige zer Schanze. Au do hettme viil Neus erfaare. Näbedra isch dennzmool dr Johanniterorde gsi und vo dohär het das Quartier dr Name biko. No de Johanniter isch denn d Familie Böckli (Kunschtmooler) mit ire viile Kinder yyzoge. D Maja hett no usenem alte Buech e Gschicht vorglääse iber dr Tod vo eim vo däne Böckli-Kinder. Es sin aim fascht d Hoor z Bärg gstande eso mystisch und scho fascht gruselig isch die Gschicht usgange. Nochhär simmer stadtywärts spaziert bis zem Dotedanz. In letschter Zyt hetts dert vii z rede gää wägenem Fescht wo jo laider nit hett kenne stattfinde.
Nochhär hämmer Durscht und Hunger ha und sin denn in Stradtkäller gwanderet. Dert sin noonemol 5 Persone ydroffe. Z ässe hetts e feine Wurschtsalat gä. Z dingge hett me sälber kenne wääle. Mied vom viile laufe und loose hämmer dä wyteri Obe kenne gniesse und froo gsi simmer dass mer in dr, hittige Zyt derfe läbe und nit im Mittelalter.
Bi unserem letschte Summerstamm isch denn kegle aagseit und natiirlig au wieder ässe und dringge. Im Weiherhof kam e alla Cart bstelle. S Drämli, dr 8er haltet jo diräggt vor em Reschtorant also isches fir alli meglig z koo.
Heidi
Foteli in der Galerie sind vo der Daniela
5. Summerstamm vom 7. August 2024, Keegle im Weierhof
So das wärs wiederemool gsi mit de Summerstämm i dängg es hett alle gfalle ämel was i so gheert ha. Vo mir us kennts no so wytergo aber gly kemme scho wieder d Iebigsstunde und das isch halt au wichtig, e sott jo an dr Fasnacht guet deene.
Also am säggsi z Obe hett me sich im Weierhof droffe, 13 Persone zem keegle und 16 Persone numme zem ässe (und natirlig au zem dringge). Das isch wieder e scheeni Aazaal Gescht gsi, Agtivi, Passivi und Activ-Passivi. Scheen fir die wos Fescht meeglig gmacht hän.
Nonem Apero sin Team vo zwei Persone bildet worde. Team gege Team hän denn gspiilt. Am Schluss hän dr Gerald und dr Axel gwunne.
Underdesse hän d Nitspiler scho kenne s Aesse bstelle und natirlig au s Dringge. Es het e spezielli Karte gä und wäm das nit glängt hett, hett au no die normali Karte kenne konsultiere. S Aesse isch wie immer guet gsi und me het derfe e grosse Hunger ha. Wo alli ire Hunger gstillt gha hän isch me zem gmietlige Teil ibergange. Gäge dr Scluss wo einigi Adie gsait hän isch me denn zämmeruggt. Ei Person hett gmeint e Glas Rote wär nit schlächt zem Schluss. Es sin denn no zwei Fläsche worde. Dr harti Kärn sitzt halt immer e klei länger, bsunders die wo kei wyte Heimwäg hän.
Das wärs fir das Joor wieder gsi. S isch schön, gmietlig und luschtig gsi.
Heidi
Foteli in der Galerie sind vo der Daniela