Bummelsunntig am 27. Merze 2022

Am elfi, scho Summerzyt, hän mir uns by prächtigem Wätter im Klaibasel im Pensiönli troffe. Es sin 23 Persone aagmäldet gsi. Bimene Glas Wysse, Bier oder Mineral hän mir unsere richtige Bummel (nit wies letscht Joor wo zwor grandios gsi isch aber ebe nit so richtig) yglyttet.

Speter sin mir denn zem Lotti ins Torstübli gange. No gwisse Missverständnis vo Syte em Torstübli hän mir denn e zweite Apero biko wo vo öperem vo uns gstiftet worde isch. Anstad dusse im Garte vos no zimlig kiehl gsi wär, hänn mer kenne dinne Platz näh. Gly isch scho s Dringge ko wo jedi und jede sälber bstellt het und eso hämmer wieder uff unseri tolli Clique aagstosse. Derno isch e feine Salat serviert worde. Dr Hauptgang isch e feine Rindsragout mit griene Sparse und eme Härdepfelstock, wo mit Randesaft gfärbt gsi isch, ganz fein isch es gsi.

Pletzlig sin viili gstreifti Musiker und Musikerinne uffträte, eppis ganz neus, nämlig en Art Gugge-Jazzbänd. Dr Name isch Los Amarones gsi. Die hän e tolle Ufftritt zeigt, ebe eppis ganz speziells. Mir hän die Darbietig wirglig gnosse. Speter hets no e Fruchtsalat mit Glace gä.

Am halbi finfi sinn mer denn uff d Gass marschiert. Es isch e hölle Buff gsi iberall, ebe so richtig 3. Bummelsunntig mit enorm viil Bsuecher aber au unglaublig viil Activi. Anstatt am zähni hämmer erscht am halbi elfi vo unserem Spiil dr obligati Wettstaimarsch derfe loose. Logisch hämmer denn au wieder Hunger gha und so simmer wie immer no im Stadthof ykeert. Mir häns wie immer sau gmietlig gha es sin viil luschtigi Sprich gfalle und unser Spiil het trotz Usfäll ganz guet teent. Und wieder isch e Fasnacht ganz vorby gange. Mir freuen is scho wenns wieder aafoot.

Heidi