Der Aafang vom neue Glyggejohr foht normalerwys mit der erschte Iebigsstund im April aa. Der Summer duure, das haisst während de Ferie, gits im Schnitt alli zwai bis drey Wuchen e sogenannte Summerstamm, wo me zämme goht go GoKart oder Kajak fahre, grilliert oder sunscht ebbis Glatts uff d Bai stellt. Zudem findet jedes Johr im Summer "em Bebbi sy Jazz" statt, welles im Rosshof firen Oobe gastiert. Für dä Aaloss organisiere mir jewyls glyggeintern s Catering.
Ab em Herbst fen denn die intensyve Fasnachtsvorbereitige statt. Das foot aa mit der Fasnachtsversammlig, wo s Sujet präsentiert wird und goht übers Larvekaschiere und Requisite bastle bis hin zur Fasnacht. Kurz vor Wiehnacht organisiert d Källermaischter e tolls Wiehnachtsässe für der ganzi Stamm, wo immer gern bsuecht wird.
Im Winter kemme denn diversi Vorfasnachtsveraastaltige dezue und die erste Marschiebige finde im Hardwald und der Grien 80 statt. Jedes ungrade Johr mache mir sälber am Drummeli mit. D Wuche vom Drummeli wurd niemerts welle misse. Zum sich uf d Fasnacht ystimme unterstitze mir jedes Johr unseri Jungi Garde, wenn si an der Allschwiler oder der Rynacher Fasnacht mitmache.
Der Fasnachtsufftaggt isch den s Laterne Ypfyffe am Sunntig Noomidaag vorem Morgestraich. Noon em Laterne Ypfyffe trifft me sich uff e Mehlsuppe und Wienerli in unserem schöne Glyggekäller. Und den starte em Bebbi sini "drey scheenste Dääg". Der Träffpunggt am Morgestraich isch jewyls d Stadthof, vo deert uus laufe mer als ganzi Glygge mit alle Seggtione die ersti Rundi. Noon eme glungene Morgestraich trifft me sich am Noomidagg für d Cortège bim Wettstaiplatz wieder. Am Mäntig und am Mittwuch nachem Cortège gniesst Stamm im Manor-Restaurant s Znachtässe. Der Fasnachtszyschtig isch d Glyggemitglider selber zur Gstaltig iberloo. D Endstraich verbinge mir im Rosshof, wo s denn no im Glyggekäller e feins z'Morge git.
S Fasnachtsjohr beende mer am 3. Bummelsunntig mit unserem Bummel. Im alljehrliche Wäggsel gohts entweder uff Lutter oder es wird en Iberraschig plaant.