Summerstämm 2022
Stadtfierig mit der Maja
5. Summerstamm 3. Auguscht 2022. Au dr 5. Summerstamm isch enorm leerrych gsi. Trotz grausamer Hitz sin doch wider 13 Altgardischte, männligi und wybligi ko loose was uns d Maja ibers St. Albantor und Umgäbig z verzelle gha het. Ebe, bi prächtigem Sunneschyn hän mir uns am St. Albantor troffe. Me het natirlig sofort e Schatteplätzli under de Baim im Park gsuecht. Schynts wäge dr SBB isch unsere Zugschef ebbis speter ko. «S macht jo nit, mir hän jo Zyt». Also d Maja het mit ihrer härzlige, luschtige Art verzellt. D St. Albanvorstadt isch allema die erschti Basler Vorstadt gsi. Dert het nit dr Daig sondern d Handwärker gwoont und gschafft. Am Rhy hets denn au e Schiffsaalegestell gä wills dert am beschte gsi sig vo dr Landschaft här. Jo, so gnau weiss alles nimme, sisch eifach z heiss gsi. D Maja hett uns denn schen am Schatte noch ins Albantal abe iber dr Dych gfiert und het denn immer wider neii Sache verzellt, zem Byspiil dass im Grabe vo dr Stadtmuure die erschte Schrebergärte vo dr Stadtgärtnerei gmacht worde sin. Au het si vom «Goldige Stärne» wo jo in dr Aeschevorstadt gstande, und denn abbaut worde isch, verzellt. Jede Balke und alli Stai sin markiert und denn ins Albantal verfrachtet worde. No etlige Joor het d Christoph Merian-Stiftig s netige Gäld parat gmacht und dr «Goldig Stärne» het wider kenne uffbaut wärde. Hit isch es jo e ganz guets Reschtorant. Mir hän d Fääri gno iber dr Rhy und sin denn ins Reschtorant Brauerei gange. Im schene Garte under de grosse Baim hän mir derfe sitze. Eso isch es rächt aagnääm gsi. E paar Mitglieder sin scho dert gsi. Däne isch es z heiss gsi fir dr Stadtrundgang. Derno hämmer wie immer rächt guet gässe. Es isch wie allewyl e bsunders glungeni Stadtfierig mit dr Maja gsi. Si verstoots eifach eim z begeischtere und si weiss halt seer viil. Au dä Aaloss isch enorm scheen, luschtig und leerrych gsi.
Stadtbrennerei
Dr 4. Summerstamm isch kulturell gsi. Mir hän uns am halber sägsi in dr Clarastroos 11 droffe. 13 Mitglieder sin ko luege wie me in dr Basler Stadtbrennerei schafft. Mir sin im Hinterhof anegsässe und hän zueglost wie uns dr Mitinhaber dr Herr Buser verzellt het wo mir do sin und was do frieher gsi isch, iber die alti Muure und dass es hindedra no e offene Dych gä het wo aber scho lang zuegschittet worde isch. In dr Brennerei hets au Muure wo mit Stai vo de frienere Muure stamme, gstaltet worde sin. Es het amme viili Brennereie gä aber hit gits numme no zwei, ebe d Stadt-Brenneiei und sunscht no eini. D Vorgabe fir sone Betrieb isch enorm hoch und natirlig au koschtspilig. Derno sin mir in d Brennerei inegange. Dert het me uns erglärt wie die Maschine fungtioniere und was eigentlig alles brennt wird. Ganz viil Fläsche si do paratgstande. Me hätt gar nit dänggt was me alles ka brenne. Vom Grappa iber Moonschnaps bis zem Gin in alle meglige verschiidene Sorte sogar no e Apsinth. Es wärde dert au noh zwei verschiideni Champagner gmacht. Die einte wärde maschinell grittlet die bessere no vo Hand uffeme richtige Rittelbrätt dreit genau wie die richtige Champagner. No däre ydrigglige Presentation hämmer derfe probiere uff was immer me Gluscht het gha. No däm tolle Erläbnis het me natirlig Hunger gha. Mer sin ins Reschtorant Bäsitörli spaziert wo mer im Garte hän derfe ässe. E paar Mirglieder sin scho dert gsi und hän uff uns gwartet. Alli hän kenne bschtelle no was si Gluscht gha hän. S Aesse isch seer guet und richlig gsi s het niemerts miesse hungrig vom Tisch. Mir hän viil z diskutiere gha iber die neue Erkenntnis vom schnapsbrenne. Das isch wirglig seer interessant gsi. Vor allem isch es wider eppis ganz neus gsi und e gueti Idee vo unserem Obmaa. Nodisno sin denn alli richtig Bett gange. Mir hän wider e scheene und luschtige Obe derfe gniesse. Schad dass es so heiss gsi isch, me hätt no viil mee kenne probiere, jä nu gschäch nit beesers.
Langschiff
3. Summerstamm 20.7.2022. Heiss, heisser denn Donner, Bitz, Rääge, Haagel. Also das isch e Schauspiil si. Mir hän zobe am sägsi bim Fiirweerboot gwartet. Unser Langschiff isch denn au pingtlig aako. S het aber scho rächt grägnet. Die meischte Teilnäämer sin scho obe am Schärme gstande. Denn hets afo schiffe und hagle. Zerscht numme kleini Hagelkerner. Mir sin denn au d Stääge uffe an Schärme gflichtet und s Schiff isch wieder abwärts under d Johanniterbrugg gfaare. Und scho isch s Schauspiil loosgange. Pingpongbällel- grossi Hagelkerner sin abeko. Uff em Rhy hesch hunderti kleini Spritzbrinneli vo däne grosse Hagelkerner gsee. Es isch fantastisch zem aaluege gsi. Mir häng wartet bis das Unwätter mer oder weniger vorby gsi isch und sin denn mit dr Fääri ans andere Ufer gfaare. Mer sin am Rhy noche abegloffe bis zem Beizli vo de Horburgfischer wo e feins Nachtässe uff uns gwartet het. Eine vo de Schiffer het uns no sini Biile an de Oberärm und am Hinterkopf vo de Hagelkerner zeigt. Si hän jo das Langschiff im Hagelsturm miesse under d Brugg bringe. Eso eppis hämmer ammene Summerstamm no nie erläbt. Jedi Mängi Bletter und Escht hets am Rhy nooche gha, sogar e Riiseascht, do hätti nit mechte drundersy. Dr Bigi vom Beizli het wieder e feine Broote und verschideni Saläter serviert. Das Aesse isch wie immer sehr guet gsi. Zem Dessert hets no e Zitroneglace mit Wotka gä. Nit z vergässe isch dass dr Beat die erschti Aperorundi zaalt het. Nonemool hindedry härzlige Gliggwunsch zem Geburtstag. Gsprächstoff hämmer natirlig gnueg gha bi däm ussergweenlige Summerstamm. Es isch wider e herrlige, gmietlige Oobe gsi. Wenn i rächt zellt ha sin wider 22 Persone derby gsi.
Scholle
Am zweite Summerstamm, am 13. Juli, sin wieder vil Activi und Passivi ko, nämlig 20 Persone hän dr Wäg uff d Scholle gno. Mir hän au unseri nei-i Vorträblere d Irene derfe begriesse. Under de schöne alte Baim isch es no rächt kiel gsi. Zerscht hän mr wie immer dr Apero gnosse und natirlig die neischte Erläbnis und Bigäbeheite diskutiert und verzellt. Pletzlig isch d Wirtin ko und het zum Tisch glade. Dusse isch es nämlig als wie wärmer worde und im Beizli inne ischs no schen kiel gsi. S Aesse isch wie scho s letschti Joor seer fein gsy; heisse Fleischkääs und e gmischte Salat anere feine Sosse und derzue Brot. S Dringge het jede jedi sälber kenne bschtelle. Nonem Aesse isch es denn au dinne als wie wärmer worde und so hämmer wider uuseziglet denn dusse isch es wider aagnämer gsi, es isch ab und zue e Liftli ko. Me het Tisch und Schtiel verschoobe so dass es e lange Tisch gä het und denn hämmer kenne wyterbächere und plaudere. Speter isch uns no e feins Glassedessrt kredänzt worde. Alli sin wider anderscht gsässe; dr Vorstand, dr Vortrab, Tambure und Pfyffer. Bi uns isch halt jede und jedi glychwärtig. Me brucht jo an dr Fasnacht au alli und me macht halt was me ka. Es isch wider emool e luschtige, gmietlige Summerstamm gsi. I has wider gnosse.
Minigolf
Am erschte Summerstamm vom 6. Juli bini numme go ässe in dr Hofmatt z Münchestai. Dorum kani nyt übers Minigolfe brichte. Es schynt aber dass es luschtig zuegange isch. S Aesse in dr Hofmatt isch scho wie s letschti Joor sehr guet gsi. Es sin 22 Aktivi und Passivi aawäsend gsi.
Heidi