610 Joor hämmer gfiirt

Zem Jubelfescht vo 8 Altgardischte und -lnne

Sisch fascht nit woor aber acht vo unsere Mitgliider hän das Joor derfe e grade Geburtstag fiire. Bis
uff de Ferdi, sin alll do gsi. Er het leider nit kenne ko.
28 Persone sin ins Beizli vom VFR (Verein für Rasenspiele) uff dr Schorematte, yglaade gsi.
Bi schönem, warmem Herbschtwätter hämmer dusse kenne dr Apero gniesse. Denn isch me
ynegange und hett sich gsädlet. Uff jedem Platz isch e luschtigs Keramikfigürli gsi, wo d Dora, eini vo
de Jubilare, gmacht hett; danggschön das isch e tolli ldee gsi.
Zerscht isch e Schoreplättli ko, mit Schungge, Salami, Käs und sogar mit herrlig frische Bretli.
Derzue natirlig Wysse, Rote, Bier und Mineral.
Dr Gerald hett e paar Wort zem Jubiläum gseit ganz ohni Spickzeedel. Me hett aagstoosse und isch
denn ibers Blättli härgfalle.
Speter hetts grillti Wirscht, natirlig noonig abgloffeni, verschiidenigs Fleisch und Salääter gää. Nonem
Aesse hett dr Rolf Junior e ganz e tolle Zeedel iber jede einzelne Jubilar und Jubilarin vordreit und hett
alle Jubilare e Guetschyn gää fir e Gratisteilnaam amene Summerstamm im nägschte Joor.
Es isch no e Desserttäller ko, wär hett welle het au no derfe e Kaffi oder e Espresso bstelle. Und eso
isch das Jubelfescht au zem Aend ko, ganz luschtig isch es gsi und halt wie immer bi uns sau gmietlig.

Heidi

Der Jubilaare-Värs

D Jubilaare - und zwor grad acht
Hänn hit e groosses Päggli gmacht
Fimpf Mool Achzig, drey Mool Sibzig
Der Obmaa fählt, s isch nit witzig
D Vizeobfrau isch befange
S Gschäfft isch drumm an Seggel gange

S bruucht d Dora T., die Jingscht im Bund
Fir e Cüpli kai bsundre Grund
Duet sich schambaar engagiere
lsch presänt und ka brilliere
Si het bi uns mit Gspyr fir d Macht
ln kurzer Zyt Karriere gmacht

Der Beat zaigt, das isch e Fraid
Syt vyle Johr Verbundehaid
Der Wääg vom fäärne Zug am See
Uff Basel duet ihm gar nit weh
Ka no mängs Johr ohni z glaage
Am Moorgestraich e Lämbbli draage

S isch d Käthi vo de Wiehlmys koo
Fiehlt schynts sich wohl und isch no doo
S Pfyffe duet si inspiriere
Wodd sich ungärn inszeniere
Lieber hälfe, understitze
Und der Glygge so vyl nitze

Hit mien mir der näggscht vermisse
Het e mänge Strigg verrisse
Und scho friehner bi de Junge
Lang ass Obmaa s Zepter gschwunge
Ass Goldschmid in der Stadt bikannt
Ych lipf my Huet em Ferdinand

S isch d Silve, unsri gueti Seel
Und an de Feschter stets fydeel
Bringt au d Blaggedde under d Lyt
Verbringt im Käller sehr vyl Zyt
Sorgt fir Oornig, unverschrogge
Griegsch si nit zem aanehogge

Wenn der Gerald uns duet fiehre
Kann ych unbeschwäärt flaniere
Nur am Zyschtig gits e Schlaufe
Duet är uff der Märtplatz laufe
S isch my Puls in d Heechi gschosse
Mir hänn wider Fride gschlosse