Im Johr 1996 isch e wichtige Mailestai in der Gschicht vo den Aagfrässene gsetzt worde. Wie s in jeedere Glygge passiert, won esoo langsam in s Alter kunnt, isch der Wuntsch noon ere Alte Garde ludd worde.

Scho vom ene Wyli isch e loosi Verainigung mit em Namme „Frind vo der Alte Garde" in s Lääbe grueffe worde. D Mitglider vo däm Verain hänn regelmässig e Batze uff d Syte doo, zem der Alte Garde – wenn si denn emool grindet isch – e finanzielli Starthilf berait z stelle. E spezielli Kommissioon het Variante zer Vorgehenswys briefft und mit ere Glyggeumfroog sinn d Uuswirggige abschätzbar worde. Mit der Grindig het men aber esoo lang wie meeglig zuegwartet, well me der Stamm mit eme substabziellen Ooderlass nit hett welle schwäche.

Denn isch aber Zyt ryff gsi und am 29. Maie 1996 isch an der Grindigsversammlig in unserem Glyggekäller d Grindigsurkunde underschribe worde. Der Hans-Jürg Erni isch zem erschten Obmaa vo der Alte Garde gwählt und e dreykepfigi Kommissioon ass Garant fir der reglementaarisch stipulierti „Sauglattismus" ygsetzt worde.

An der Fasnacht 1997 isch die Alti Garde s erscht Mool gloffe. „Alt & Gsund" isch s Sujet gsi in Aaspilig uff der Zuestand vo de mehr oder weeniger rischtige Altgardischte – mit eme guete Schuss Sälbschtironie! Der Grüttertee-Boopscht, Pfarrer Kienzli, het d Vordersyte vo der Ladärne ziert, wo der glyggenaigeni Kinschtler, Rolf Meyer sen., gmoolt het.

Die Alti Garde isch vo Aafang aa en aigewilligi und undernähmigsluschtige Huffe gsi. Das het sich under anderem au in der ainzigartige Gstaltig vom Kopflatärnli widergspieglet, wo mir an der Fasnacht 1998 s erscht Mool der Fasnachtswält präsentiert hänn.