Aendlig wieder Sparseässe

Am Mittwuch am 11.Mai isch es wieder so wyt gsi dass mer uns hänn könne im Sängerstübli z Rieche zem Sparseässe träffe. Lang hämmer warte miesse und alles numme wäge däm bese «C». Aber jetz hetts wieder klappt. So um die Sägsi z Obe sin d Altgardischte im Gärtli vom Sängerstübli ydrudlet.

24 Persone hämmer derfe begriesse, sogar e Drummelaspirant dr Bruno hämmer kenne biguetachte. Dr Drummelchef het em denn au grad d Note gäh dass er au scho ka iebe.

Nonem Apero im Gärtli sin mer denn ins Reschtorant ine gange, me hett Platz gnoo und scho bald isch dr erschti Gang, e Sparsecrèmesippli, uffdischt worde. Sie isch seer fein gsi, wie immer. Me hett denn au dr Wy bschtellt dass mer auch uff dä wieder neui Evänt hett kenne aastoosse. Derno sin riesigi Schunggeplatte, holländischi Sosse und Mayonneese uff dr Tisch ko und denn sin d Sparse und d Broothärdepfeli uff de Täller serviert worde. D Sparse sin guet gschellt und schön weich gsi, me hetts Gfyyl vo Frischi gha. Aesse hett me kenne so viil me hett mege. S Personal isch immer wieder mt Noochschub vorby ko. Köschtli wie immer isch das Aesse gsi, mir hänns gnosse. Noneme Wyyli hetts denn au no e Desserttäller gää und natürlig fir die meischte au no e Kaffi oder e Espresso. Do und dert hett me au no e Dischestif gsee.

Leider hänn e paar nit kenne bi uns sy. Entwäder sin si krank gsi und zwei hänn sogar im Spittel miesse ihri Zyt verbringe aber das isch halt s Los vonere alte Garde. Mir gsunde hänns in volle Zyg gnosse. Es isch luschtig und gmietlig gsi wie immer wenn mir e Fescht mache und mer freue uns scho dass s neue Cliquejoor wieder aafoot. Heidi