Im Johr 1971 het dr Stamm vo de Aagfrässene beschlosse, dass si der Stamm wän für Fraue zue mache. Dr Gedangge derhinter isch gsi, dass me mecht e "Männerglygge" wärde. Me het aber bi dr Junge Garde, wo au im 1971 grindet worde isch, trotzdäm no Maitli uffgno, damit die mangels Noochwuuggs nit wieder ygoht. Damit all die Maitli, wo bi dr Junge Garde pfyffe glernt hän, mit dr Volljährigkeit die Aagfrässene nid mien verloo, sin 1977 d Rosshofspatze grindet worde. 

Im 1978 simmer die erscht Fasnacht zämme gloffe. Sit denn verbringe mir alli sehr gern Zyt mitenander, sigs an dr Fasnacht, im Pfyffe oder an sunschtige Aaläss.

Mir, d Spatze, sin e glai aber feyn Pfyffergrippli und kenne drum numme Fraue ab 18 Johr, wo kenne pfyffe oder wän Vortrab mache, uffnäh. Wenn de me Infos wottsch oder Frooge hesch, denn mäld di doch bi unserer Obfrau, dr Corinne Bühler. Ihri Date findsch unter "Rosshofspatze - Kontaggt".