Sparseässe 2024

S isch scho wieder Sparsezyt und immer denn goot die alti Garde ins Sängerstübli in Rieche ebe go Sparseässe. Das isch e langjörigi Tradition. Es isch immer guet und me ka e grosse Hunger ha, s hett immer no mee.

Also am 22. Maie bi wiederemol schönem Wätter het me sich am halber sibeni im Garte vom Reschtorant troffe. Zerscht wie immer zemene Apero. Speter isch me denn inegange zem ässe. Etligi wo nit so zwäg gsi sin hän sich scho vorhär im Reschtorant gmietlig gmacht. Leider muess i saage bini au bi däne gsi. Me het sich begriesst und vo däne wo Altgartischte wärde sin au scho drei Persone aawäsend gsi. Es het das Joor seer vieli Bsuecher gha und i finds immer schön, bsunders fir die wo esone Evänt arrangiert hän denn das isch viil Arbet- und Zytuffwand.

Also jetz isch es losgange. Zerscht het me eppis z dringge bschtellt und scho bald ischs Sparsesipli ufftischt worde. S isch zwoor zimlig dinn gsi aber trotzdäm seer guet. Nonem abruume sin grossi Platte mit verschiidenem Schungge und kleini Schaale mit Majonnaise und Sosse holandaise ko. Jedi Person het e Täller mit Sparse und kleine Brothärdepfeli biko. Und jetz hesch so richtig kenne zueschloo, was i au gmacht ha . I ha e Mordshunger gha, es isch au wieder guet gsi.

Me het plauderet und glache, sich s Neuschte verzellt, mir hän jo e langi Pause gha will d Fasnacht eso frie gsi isch. (D Oeggslifragtion isch natirlig immer tätig gsi) Nochhär isch au s Dessert serviert worde. Au das isch seer fein gsi bsunders miteme Espresso. Langsam het Uffbruchstimmig gherrscht offebar sin d Lyt langsam mied worde und me het sich uff e Heimwäg gmacht. E isch wieder e scheene Obe gsi i ha mi gfreit wieder emo alli zgsee. Bald goot jo s iebe wieder los und scho gli kemme d Summerstämm wieder, i frei mi druff.

Heidi