Summerstämm 2023

 

Empfangscomité

 

1.     Summerstamm vom 5. Juli 2023, der Superknaller

Es isch fascht nit woor aber die erschti Helfti vom 2023 isch scho wiider vorby.

Am letschte Mittwuche am 5. Juli hän mir uns zum drationelle Superknaller im Stadthof droffe. So ebbe am halbi sägsi sin die erschte  Gescht aako. Me isch denn uffe ins Gässli spaziert wo d Tisch mit Sunneschirm parat gsi sin. Es isch e prächtige, warme Summeroobe gsi. Dr Supperknaller heisst eso , wills Aesse, Beischungge und Härdepfelsalat und s Dringge (ohni Schnapps) à disgretion isch. Mer sitze am Fuess vo de alte Muure vom Lohnhof. Es herrscht dert e ganz spezielli Atmospfäre. Es isch aber au immer seer gmietlig. Me het sich e Plätzli usgsuecht und nodisno sin Dambure, Pfyffer, Vorträbler und Passivi ydruudlet. Zerscht hett me eppis z dringe bschtellt, es isch jo rächt durschtig gsi und denn ischs Plaudere losgange. D Källner vom Stadthof sin wie immer frindlig und flissig gsi, sie hän unseri Winsch immer erfillt.

Gly isch denn sAesse ko, ebe Beischungge und Härdepfelsalat. D Täller sin schen mit Grienem- Nüsslis- Rieblisalat und eme Tomätli dekoriert gsi. Derzue hets natirlig Brot und Sänf gää. Mir hän das Aesse gnosse, es isch fein gsi.  Nochhär isch jo au no nocheserviert worde. Me hett also nit miesse hungere. Als Deggeli hämmer natirlig no e Kaffi oder e Espresso gnämiget. Speter isch me bim Wysse bim Rote oder bim Bier gsässe und het iber alles meglige diskutiert und zem Schluss isch nonemool e Espresso uffgfaare worde. Es isch wiider e glungene Oobe gsi. Mir häns alli gnosse und mir fraie uns scho uff dr nägschti Summerstamm.

 

2. Summerstamm vom 12. Juli 2023, Bsuech uff der Scholle

Scho hämmer dr zweiti Summerstamm derfe fiire und zwor simmer wie scho zweimool uff d Scholle gange. Es hett uns dert eso guet gfalle dass mer halt jetz zem dritte Mool dert sin go ässe. E Dail hän sich scho bim Schitzehuus troffe, sin denn bis Lette gfaare und vo dert mit em Buss bis Buech, ebe uff d Scholle gfaare. Die meischte Altgardischte und Altgardischtinne sin scho am Apero gsi. Es sin wieder 24 Persone aagmäldet gsi und au alli sin ko.

Es isch e ganz e schene, agnääme Summeroobe gsi, s hett zwor Wolgge gha aber es isch drogge blibe, so no nem Moto «wenn Engel reisen lacht der Himmel». Und denn isch es losgange, was me do alles vernoo het. E Dail sin jo scho in de Ferie gsi und händ d Erläbsnis verzellt. Natirlig hett me au iber d Politig läschteret, was die  wieder alles fir Idee hän. Si gän unser Gäld us fir jedi spinnigi Megligkeit wo si finde es miessti netig sy.

Aber jetz het sich der Hunger gmäldet und scho bald isch im gmietlige Beizli s Aesse serviert worde. D Tämperature sin dinne wie dusse seer aagnäm gsi. Es isch immer e laus Liftli gange und so hett me dä heissi Summer gar nit gspyrt. Zem aesse hets e scheen degorierte Täller gä mit Fleischkääs, Härdepfel- Riebli- grienem Salat und derzue es feins, frisches Brot. Z dringge het me sälber kenne bstelle, no was me gerad Luscht gha hett. Jedefalls isch es in dr Beiz pletzlig still worde, e Zeiche dass es alle gmundet het. Me hett au wider kenne Supplement ha. No nem Aesse simmer wider in Garte gsässe und dert isch speter au s Dessert serviert worde, e Glace mit eme Schwyzerkrytz. Me hett au do nit miesse hungrig vom Tisch. Iber viil isch wider diskutiert und gschimpft worde aber nit numme, mir hän au  viil z lache gha. Es isch wiider, wie immer bi uns , sau gmietlig gsi. Die Summerstämm göön immer eso schnäll umme, mir freue uns scho uff nägschte Mitwuch.

 

3. Summerstamm vom 19. Juli 2023, s'Langschiff

Am 3. Summerstamm hämmer unseri draditionelli Faart mit eme Langschiff derfe mache. Am sägsi Zobe isch das Schiff am Stäg vo dr Fääri aaglandet. Gfiert häns dr Roland und dr Steffi vom Wasserfaarverein  Horburg. Dr Rolf, unser Passivmitglied, het gluegt dass alles guet goot. Mer sin ins Schiff ygstyyge, wo mit viile Fäänli degoriert gi isch und denn «Leinen los» und mir sin rhyuffwärts Richtig Birsfälder Krafftwärgg gfaare worde. Au wie gwoont het me kenne Bier, Wysse Cola oder Wasser ha und derzue Salzstängeli und-Brätzeli.

Es isch immer scheen unseri Stadt vom Wasser us aaluege z kenne. E grossi Zaal vo Schwimmer und Schwimmerinne sin uns bi däm prächtige Summerobe bigägnet. Vor em Kraftwärgg hämmer umkeert und sin ryhabwärts gfaare bis wyt abe, wyter als s Dreiländeregg. Dr Steffi het viil verzellt was wo gsi isch und dass es do und dert no Kanäl git wo me bis in d Roone ka faare. Zem Teil sin si nimm bifaarbar aber bim einte isch es schynts no meglig. Dr Steffi het eso viil gwisst wo mir gar kai Aanig gha hän. Das isch e supper «Rhy-seeing» gsi.

No däre lange Schifffaart hämmer under dr Johanniterbrugg glandet und e paar vom Wasserfaarverein Horburg hän uns bim uusstyge gholfe. Mir hän natirlig Hunger gha und dorum simmer diräggt in d Klause vom Fischerclub Horburg gange. Tisch und Bängg sin dusse uffgstellt gsi, Hejo, bi so wunderscheenem und nit heissem Wätter. E Teil vo unsere Mitglieder sin scho dert ghögglet. S Aesse het me sich  sälber kenne hoole. Es het e feine Broote, verschideni  Saläter und e Platte mit Tomate und Mozarella gä und natirlig feins Brot. Es isch wyder e feins Aesse gsi, mir häns gnosse, au miteme Glas Wy oder Bier. Speter isch no e Glace ko und wär het welle miteme Gutsch Wodka. Scho bald het me sich Adie gsait bis zem nägschte Mitwuche. Sisch wyyder herrlig gsi.

 

4. Summerstamm vom 26.7.3023

In dr Boccia-Halle in Allschwil hämmer am 4. Summerstamm gleert wie me Boccia spiilt. Mir hänn uns in däre Halle am sägsi Zobe troffe. Dert hett me miesse ganz suberi Schue aaziie, nit Strooseschue. Denn het me e Yyfierig vomene Clubmitglied gha. D Regle het me uns erglärt und wie me muess aanestoo und wie me die 900gr-Kugele setze soll. Mir hän denn derfe e Leesli zie und so hettme gwisst mit wäm me zämmespiilt. Es hett zwei 4er- und e 6ergruppe gää. Und loos isch es gange.

Zerscht het epper s Polini, die glaini Kugele wyt in s Fäld schiesse miesse und nochhär het me dr erschti Schuss gmacht. Jedi Gruppe het e eigeni Farb vo Kugele gha. Zem Byspil grien oder gääl. Isch dr zweiti Schuss nööcher bym Kügeli gsi als dr erschti het die anderi Farb miesse schiesse bis wiider eini no  nöcher gsi isch. Denn isch wiider die anderi Farb draakoo. E Betreuer het immer gluegt dass me das au richtig macht. Eso isch es wyter gange bis alli Kugele gschosse worde sin. Wär am nägschte bim Kügeli gsi isch hett e Punggt verdient. Wenn vo dr glyche Farb zwei oder drei am nägschte gsi sin hetts fir die Farbe  2 oder 3 Pingt gää. Obe an dr Deggi hets e Aazeig gha. Do het me gsee wieviil Pingt me hett. Me isch denn ans anderi Aend vo dr Baan gange und dert hets Spiil wider aagfange. Es het 4 Durchlaif gää denn isch wider frisch uusgloost worde.

Es isch gar nit eifach gsi, die Kugele isch grollt und grollt und grollt. Mit dr Zyt isch es denn besser gange, me hett langsam s»Feeling» bekoo. Aber pletzlig isch doch wider eini drnäbe glandet. Mir hän wirgglig dr Plausch gha. D Zyt isch so schnäll vergange und scho isch zem Aesse gruefe worde.

Es het e scheen aagrichtete Fitnesställer gä mit verschiidene Saläter und eme feine Steak. Zem Dessert isch no e Aerdbeeri-Coup ko. Mir hän wider e luschtige Summerstamm derfe gniesse. Es sin im ganze 18 Persone ko und 14 dervo hän gspiilt.

 

5. Summerstamm vom 2.8.2023, Hafemuseeum

Am halber sägsi z Obe het uns d Maja, unseri Pfyfferinstruggtere, am Yygang vom Hafemuseeum z Glaibasel empfange. Es sin fascht alli Persone mitenand aako. So isch es halt bi dr Alte Garde e kemme alli zer Zyt. Mir sin denn yynegange und me het sich imene Kreis anegsetzt. Jetz sin alli Lyt do gsi und d Maja het kenne loslege mit dr Gschicht vo dr Glaibasler Schifffaart. Es isch seer uffschlussrych gsi, natirlig mit dr Maja irer luschtige und anegtooteryche Art hesch immer wiider kenne lache. Z dringge hets natirlig  au gää, hejo bi so warmem Wätter. Glaihynige het sich seer veränderet in de  letschte Joor mit all däre Schifffaarts-Industrie. Mir hän aber au gheert wie das Dorf synerzyt zue Basel, ko isch und denn au yygmeindet worde isch. D Basler Heere hän viil versproche, unter anderem sogar e Brausebad, was denn halt nie ko isch, aber d Abstimmig isch scho positiv und vorby gsi.

Speter isch me in erschte Stogg vom Museeum gange. Dert hets e Relief mit em ganze Haafe-Areal und em Drum und Dra, sogar Koolebärge kame dert gsee. Das Museeum isch wirglig seenswärt, do kame  stundelang luege, läse und au e Film aaluege.

Nochhär simmer durs Dorf spaziert und au do hämmer seer viil Gschicht kenne erfaare. Im Schluss vo däm Rundgang simmer im Reschtorant «Seemannskäller» aako und dert hets z aesse gää. Fischknusperli oder Wurschtsalat und derzue Pommesfrites. S isch fein gsi und mir hän wiider e gmietlige Obe derfe verbringe. In das Hafemuseeum gang i wiider und nimm mer denn viil Zyt. Es loont sich.

Heidi 

 

6. Summerstamm vom 9.8.23, Kaigle

Jo, wenn das Heidi nid derby isch, denn sind Brichtli rar...